Policia e Kosovës ka parandaluar një rast të dyshuar të kontrabandës së mallrave, me vlerë të përgjithshme që dyshohet të jetë mbi 5,000 euro.
Sipas Policisë, një automjet-furgon dyshohet se ka hyrë ilegalisht në territorin e Republikës së Kosovës nga Republika e Maqedonisë së Veriut.
“Me 26.08.2026, nga drejtimi i fshatit Tanushë, RMV, është vërejtur një automjet-furgon me ngjyrë të bardhë dhe me targa vendore, duke hyrë ilegalisht në territorin e Republikës së Kosovës, në drejtim të fshatit Mjak, Viti”, thuhet në njoftimin e policisë.
Pas ndalimit të automjetit, policia ka gjetur një sasi të konsiderueshme të produkteve ushqimore, përfshirë çipsa, pashteta dhe gullash gjedhi.
“9,525 copë çipsa;700 copë pashteta, me peshë nga 95 gramë;750 copë gullash gjedhi, me peshë nga 200 gramë. Për mallrat e lartcekura drejtuesi i automjetit nuk posedonte asnjë dokument mbi prejardhjen apo importimin e tyre, ndërsa produktet kishin mbishkrime të Republikës së Maqedonisë së Veriut”, thuhet më tutje në njoftimi e policisë.
Në lidhje me rastin, policia ka bërë të ditur se mallrat, së bashku me automjetin, janë sekuestruar dhe janë dërguar në terminalin doganor për procedura të mëtejshme.
Rasti është duke u trajtuar nga organet kompetente.
