Policia e Kosovës, përmes njësive të Policisë Kufitare e Kosovës nga Drejtoria Rajonale Kufitare Jugu, ka parandaluar një rast të kontrabandimit me mallra në zonën kufitare mes Kosovës dhe Maqedonisë së Veriut, në kuadër të planit operativ “Mburoja e hekurt”.
Rasti ka ndodhur në zonën malore ndërmjet fshatit Radush dhe rrugës që lidh fshatin Goranc me Hani i Elezit. Gjatë patrullimit, njësitet policore kanë identifikuar një automjet që po lëvizte në një rrugë ilegale nga territori i Maqedonisë së Veriut në drejtim të Kosovës.
Sipas policisë, drejtuesi i automjetit ka tentuar të ikë së bashku me një pasagjer, por është ndaluar nga zyrtarët policorë. Në këtë rast është arrestuar një i dyshuar, shtetas i Maqedonisë së Veriut.
Gjatë kontrollit të automjetit janë gjetur dhe sekuestruar mallra të ndryshme, vlera e të cilave, sipas vlerësimeve fillestare, arrin në dhjetëra mijëra euro. I dyshuari nuk posedonte dokumentacion që dëshmonte prejardhjen e mallrave.
Me vendim të prokurorit kompetent, i dyshuari është ndaluar për 48 orë, ndërsa automjeti dhe malli janë konfiskuar si dëshmi materiale në procedurë penale.
Policia e Kosovës ka theksuar se mbetet e përkushtuar në luftimin e kontrabandës dhe aktiviteteve të tjera të paligjshme në zonat kufitare.
