Policia e Kosovës ka bërë të ditur se gjatë ditës së shtunë ka parandaluar dy raste të kontrabandës, derisa thotë se në të dyja rastet bëhet fjalë për kontrabandim të pulave nga Serbia për në Kosovë.
Në rastin e parë rreth orës 1 pas mesnate në fshatin Zhabar të Mitrovicës është ndaluar një kamion me targa të Kosovës dhe janë gjetur 200 pula të kontrabanduara nga Serbia.
“Rreth orës 01:00, në fshatin Zhabar-K.K. Mitrovicë, është ndaluar kamioneta Volkswagen LT46, ngjyrë e teget, me targa RKS (02), me rreth 200 (dyqind) pula të kontrabanduara nga territori i Serbisë, me vozitës E.M., Mashkull/Kosovar, 37-vjeçar, me banim në Mitrovicë”, thuhet në njoftim.
Ndërkaq, në rastin e dytë në fshatin Bube të Zubin-Potokut është ndaluar një veturë me targa të Kosovës, ndërsa i janë zbuluar 550 pula të kontrabanduara nga Serbia.
“Rreth orës 18:30, në fshatin Bube-KK. Zubin Potok, është ndaluar kamioneta Mercedes Benz, ngjyrë e gjelbër, me targa RKS (02), me rreth 550 (pesëqind e pesëdhjetë) pula të kontrabanduar nga territori i Serbisë, me vozitës H.B., Mashkull/Kosovar, 50 vjeçar, me banim në Mitrovicë”.
Malli i kontrabanduar është dërguar në terminalin doganor në Mitrovicë për procedura të mëtejme nga Dogana e Kosovës dhe Agjencia e Ushqimit dhe Veterinës./teve1.info/
