Nga nisma “Asnjë centë më shumë” pritet edhe protesta e radhës për kundërshtimin e shtrenjtimit të rrymës.
Siç ka njoftuar njohësi i çështjeve ekonomike, Shenoll Muharremi, protesta e radhës do të mbahet të premten më 11 prill.
Protesta pritet të nis nga ora 11 në sheshin “Zahir Pajaziti” në Prishtinë.
“Kjo shoqëri ka tepër nevojë me protestu. Demokracia ka ekzistu, po ma shumë në letra e për të fortin.. Nuk ka punu mjaft për qytetarin, e as për bizneset vendore. Tash po vjen koha me u ngrit për interesin publik, për energji të drejtë, për jetë më të mirë. Bravo djema e vajza! Kjo është patriotizëm, me luftu për qytetarin, për familjet, për bizneset”, ka shkruar Muharremi në Facebook.
Sot, ministrja në detyrë e Ekonomisë, Artane Rizvanolli i ka propozuar Zyrës së Rregullatorit për Energji (ZRRE) që për konsumatorët që harxhojnë më pak se 800 kËh, të mos ketë rritje të çmimit të rrymës për sivjet.
Rizvanolli nëpërmjet një video-mesazhi në Facebook, tha të hënën se konsumatorët e tjerë që shpenzojnë mbi 800 kilovat orë energji, rritja të jetë “sa më e ulët”.
Ndërkohë, më 11 prill pritet të miratohen tarifat e reja të energjisë elektrike. Paralajmërimi i ZRrE-së për ngritje të çmimit të energjisë elektrike për 15% ka shkaktuar pakënaqësi të madhe te qytetarët dhe bizneset. Të shtunën është mbajtur një protestë, përmes të cilës është kundërshtuar shtrenjtimi i energjisë elektrike.
