Ani pse për shumëkënd kryeministri Albin Kurti, nuk do ta pranojë në asnjë mënyrë formimin e Asociacionit të komunave serbe, njësoj nuk po mendojnë nga partia e Dardan Molliqajt.
Zgjim Hyseni nga PSD, thotë se Kurti është i gatshëm t’i ndryshojë qëndrimet edhe për këtë temë.
Bile, për ta ndalur një gjë të tillë, ai paralajmëron organizimin e protestave në sheshet e Prishtinës.
Pak më ndryshe po mendon njohësi i çështjeve politike, Lavdim Hamidi.
Sipas tij, kryeministri kosovar, tashmë është në mes dy zgjedhjeve: ose krijimin e asaj që dikur sa ishte në opozitë i thoshte “Zajednicë”, ose amerikanët do e dërgojnë Kosovën në zgjedhje të reja.
Tëvë1 ka tentuar të marrë deklaratë edhe nga zyrtarët e Qeverisë, por që të njëjtit nuk kanë qenë të qasshëm në thirrjet e redaksisë.
I deleguari special i SHBA-së për Ballkanin, Gabriel Escobar, është duke qëndruar në Kosovë, ku do të ketë një sërë takimesh.
Menjëherë pas Kosovës, ai do të fluturojë për në Beograd, ku do t’i takojë aktorët kryesor të politikës serbe.
Temë e diskutimit të kësaj vizite është arritja e marrëveshjes Kosovë – Serbi. Madje, amerikanët nuk kanë hezituar që nëse është e nevojshme në këtë temë të involvohet direkt edhe Sekretari amerikan i Shtetit, Antony Blinken.
Kronika e gazetarit Arton Rama.
