Pas veprimeve të ekzekutivit në pjesën veriore të vendit, të cilat ndërkombëtarët i quajtën veprime të pakoordinuara, u paralajmëruan masa të reja për Kosovën.
Ani pse aktualisht janë vetëm paralajmërime, vlerësohet se nuk është larg që ato të bëhen masa konkrete.
“Në qoftë se ne nuk koordinohemi me ta apo në qoftë se ne vazhdojmë që të marrim vendime kokë më vete, sidomos vendime të cilat Bashkimi Evropian dhe Shtetet e Bashkuara të Amerikës i konsiderojnë si veprime të cilat mund të cënojnë sigurinë, atëherë jam shumë i sigurt që edhe këtë paralajmërim do ta zbatojnë. Do të thotë ka rrezik real që Kosovës t’i forcohen masat”, ka thënë Blerim Canaj, ish-diplomat.
Në këto paralajmërime, nuk u përmend natyra e masave, por që konsiderohet se ato mund të përfshijnë edhe sanksione për persona të caktuar nga radhët e kabinetit qeveritar.
“Masat mund të jenë ekonomike, politike e nuk përjashtohet mundësia që të ketë masa të shpalljes non grata për persona të caktuar brenda Qeverisë së Kosovës. E mendoj se këto do të ishin masa nëse eventualisht do të kishte një eskalim të situatës pas hapjes së urës së Ibrit, por që mendoj se gjasat për të pas një eskalim të situatës janë minimale”, ka thënë analisti Fidan Ukaj.
Nga BE-ja të enjten u tha se masat ndaj Kosovës mund të ashpërsohen nëse për këtë gjë, pajtohen akterët e këtij institucioni.
