Ushtria izraelite ndërmori një tjetër sulm ndërkufitar në Sirinë jugore të martën, duke shpërthyer një pikë të braktisur ushtarake, pavarësisht thirrjes së Presidentit të SHBA-së, Donald Trump për përmbajtje.
Sipas raportimit të kanalit shtetëror Alikhbariya, dy tanke izraelite dhe 10 automjete ushtarake hynë në fshatin Samdaniya al-Sharqiya në provincën jugore të Quneitrës, citon Anadolu.
As ushtria izraelite dhe as autoritetet siriane nuk kanë komentuar menjëherë mbi raportin.
Ky sulm pasoi bastisjet e kryera një ditë më parë në dy fshatra siriane në Quneitra, pjesë e një seri ndërhyrjesh pothuajse të përditshme në jug të vendit që kanë vazhduar prej muajsh.
Të hënën, Trump bëri thirrje për përmbajtje në rajon.
“Është shumë e rëndësishme që Izraeli të mbajë një dialog të fortë dhe të vërtetë me Sirinë dhe të mos ndodhë asgjë që do të ndërhyjë në evolucionin e Sirisë në një shtet të begatë”, tha ai.
Trump gjithashtu vlerësoi Presidentin sirian Ahmad al-Sharaa, duke theksuar se ai po “punon me zell” për të siguruar që “të ndodhin gjëra të mira” për të dy vendet.
“Ky është një mundësi historike… për paqen në Lindjen e Mesme”, tha ai.
Sipas të dhënave të qeverisë siriane, që nga dhjetori 2024 Izraeli ka kryer mbi 1,000 sulme ajrore në Siri dhe më shumë se 400 bastisje ndërkufitare në provincat jugore.
