Siç ka njoftuar deputeti i PDK-së, Mërgim Lushtaku protesta do të mbahet pas deklaratave të kryeministrit Albin Kurti për ish-politikanin serb Oliver Ivanoviq.
“Të indinjuar thellë me veprimet e Kryeministrit të Republikës së Kosovës, Albin Kurtit dhe tentimin e tij për të amnistuar kriminelin e luftës, ideatorin dhe kryerësin e vrasjeve të shqiptarëve civil, Oliver Ivanoviqin, e kemi për obligim t’i bashkohemi thirrjes së fëmijëve të dëshmorëve të Ushtrisë Çlirimtare të Kosovës, për protestë, me moton: “Kryeministër, mos na shkel në gjak! Stop, devijimit të historisë!”, ka shkruar Lushtaku.
Protesta do të mbahet në sheshin “Skenderbeu” teksa nisja do të bëhet në ora 12:00 nga Sheshi “Zahir Pajaziti”.
“Qëllimi i kësaj proteste është ndërgjegjësimi për më shumë kujdes, maturi dhe përgjegjësi ndaj historisë, të tashmës dhe të ardhmës së vendit tonë”, ka shkruar Lushtaku.
Ndryshe në 5 vjetorin e vrasjes së ish-politikanit serb Oliver Ivanoviq, kryeministri Albin Kurti e kishte quajtur atë njeri “që kishte punuar për interesat e komunitetit të vet”dhe kishte porositur “të ruhej kujtimi për të”. Kjo kishte ngjallur reagime të shumta, marrë parasysh dëshmitë se Ivanovoq kishte marrë pjesë në masakra ndaj shqiptarëve.
