U thirr në foltore për të dhënë një propozim.
Por, kryetari i Lëvizjes Vetëvendosje, parashtroi një kërkesë.
Koha shtesë për arritje të një marrëveshje për president, u bë shkas që seanca për konstituimin e Kuvendit të ndërpritet me vendim të kryesuesit të Kuvendit.
Ky veprim po cilësohet si taktikë e habitshme nga partia e cila e ka shumicën e deputetëve në Kuvend.
“Është e habitshme sepse Vetëvendosje i ka numrat për ta konstituar parlamentin. Pohimi se i duhet kohë shtesë për të përcaktuar, për t’u marrë vesh në këtë rast me LDK-në për presidentin, nuk qëndron sepse ka edhe dy muaj kohë pas konstituimit të parlamentit dhe është pak paradoksale që të dyshosh se dy muaj nuk do të mjaftojnë, ndërkaq të kërkosh që brenda 24 orëve të merresh vesh me LDK-në”, deklaroi analisti politik Melazim Koci.
Rasti i së enjtes, vlerësohet se krijon hapësirë për hyrje në një krizë të radhës, për çka kërkohet ndëshkim nga qytetari.
“Ne mund të futemi duke fajësuar njëri tjetrin, pozitë – opozitë, në një krizë tjetër ciklike e cila nuk mund të ketë fund dhe siç po shihet nga këta njerëz të papërgjegjshëm edhe nuk duket ta ketë fundin e saj, që është përsëri e papranueshme dhe që do duhej definitivisht qytetari ta ketë parasysh këtë dhe të sillet meritorisht. Pra, ashtu siç e meritojnë kjo klasë politike, e kjo do të thotë faktikisht ndëshkim i tyre sepse edhe ashtu iu ka dhanë leksion, porosi e mesazh votuesi në zgjedhjet e fundit. Ka munguar në zgjedhje, megjithatë mund të ketë mungesë më tepër, mund të ketë humbje të legalitetit dhe legjitimitetit”, tha pfofesori universitar, Mazllum Baraliu.
Kërkesa për kohë shtesë, nuk u prit mirë nga partitë opozitare, të cilat e vlerësuan si papërgjegjshmëri.
