Ajo që po diskutohet javëve të fundit është propozimi franko-gjerman.
Në Kosovë, nuk është mohuar prania e njëpropozimit të tillë.
Gjatë ditës presidentja e vendit, Vjosa Osmani, tha se iniciative franko-gjermane ka për qëllim përshpejtimin e procesit të dialogut.
“Çdo iniciativë e partnerëve tanë është serioze. Iniciativa është që të intensifikohet procesi i dialogut dhe natyrisht që si Franca, si Gjermania kanë qenë historikisht partnerë aleatë dhe mbështetës të Republikës së Kosovës”, tha Osmani.
Politologu Dritëro Arifi, thotë se çdo propozim që nuk përfshinë njohjen e Kosovës nga pesë vendet e BE-së, është humbje kohe.
“Po është e vërtetë, tash kemi shumë drafte, shumë propozime, shumë ide, por zgjidhje asnjë. Ky është momentumi politik sa i përket dialogut Kosovë – Serbi … Sepse zgjidhja e vetme dhe ideale është njohja e Serbisë, nëse ajo nuk bëhet e kanë edhe një mundësi të dytë, ajo është njohja nga pesë vendet e BE-së. Pra, nëse BE-ja nuk është e aftë me i bind pesë vendet e veta të BE-së me e njofto Kosovën asnjë zgjidhje tjetër nuk do të jetë po themi zgjidhje kreative”, deklaroi Arifi.
Kryeministri i vendit albin Kurti ka deklaruar se diskutohen shumë modele, por nuk ka diçka përfundimtare që mund të quhet propozimi franko-gjerman.
“Mënyra se si po shmanget zotëri Kurti për ta sqaruar dhe zotëri Vuciq për ta sqaruar tregon që marrëveshja është në tryezat e tyre. Kam ndjekur edhe prononcimin e ministres së jashtme të Kosovës zonjës Gërvalla, e cila po ashtu pranon ekzistencën e një dokumenti. E pa qartë është modaliteti dhe metodologjia që është në bazë të këtij propozimi dhe kjo besoj do të sqarohet në ditët në vazhdim”, tha njohësi i çështjeve politike, Ben Andoni.
Në anën tjetër burimet e tëvë1 bëjnë të ditur që nuk ka ndonjë propozim përfundimtar. Madje një model që pati qarkulluar në media, qeveria gjermane e kishte mohuar se është prodhuar nga Gjermania, Franca ose edhe BE-ja.
Kronika e gazetarit Valmir Gallopeni.
