Gjatë vizitës së tij në Turqi, Papa Leo XIV deklaroi se Vatikani ka zgjedhur Urën e Dardaneleve – strukturën e madhe të varur që lidh Evropën me Azinë – si simbol dhe logo të udhëtimit të tij, duke e përshkruar atë si një metaforë të rëndësishme për rolin unik të vendit.
Sipas tij, Turqia nuk është vetëm një urë që bashkon kontinente dhe kultura, por edhe komunitetet e saj të larmishme të brendshme.
Në fjalimin e mbajtur në Ankara, Leo theksoi se fuqia e Turqisë buron nga diversiteti i saj i brendshëm, duke e cilësuar vendin si një “udhëkryq ndjeshmërish”.
Ai shtoi se ky diversitet i jep Turqisë një rol të pazëvendësueshëm si në të tashmen ashtu edhe në të ardhmen e Mesdheut dhe të botës.
“Ju keni një vend të rëndësishëm si në të tashmen ashtu edhe në të ardhmen e Mesdheut dhe të të gjithë botës, mbi të gjitha duke vlerësuar diversitetin tuaj të brendshëm. Edhe përpara se të lidhë Azinë me Evropën dhe Lindjen me Perëndimin, kjo urë lidh Turqinë me vetveten”, tha Leo, duke përdorur drejtshkrimin e preferuar të qeverisë turke për vendin.
Në një takim zyrtar me Presidentin Rexhep Tajip Erdogan, Papa amerikan ripërsëriti thirrjen e tij për paqe dhe dialog, shkruan AP.
Duke folur në bibliotekën e kompleksit presidencial, Leo vlerësoi historinë e Turqisë si urë midis Lindjes dhe Perëndimit.
“Uroj që Turqia të jetë burim stabiliteti dhe afrimi midis popujve, në shërbim të një paqeje të drejtë dhe të qëndrueshme”, tha ai, duke folur para një globi gjigant.
“Sot, më shumë se kurrë, kemi nevojë për njerëz që do të promovojnë dialogun dhe do ta praktikojnë atë me vullnet të vendosur dhe vendosmëri të durueshme.”
