Papa Leo XIV ka dënuar ashpërsinë e luftës në Gaza dhe “përdorimin pa dallim të forcës”, ndërsa ministria e shëndetësisë e Gazës tha se të paktën 73 palestinezë ishin vrarë duke pritur në radhë për ushqim.
Ministria tha të dielën se viktimat ishin vrarë në vende të ndryshme, kryesisht në Gazën veriore.
Ajo tha se 67 nga të vdekurit ishin vrarë nga sulmi izraelit ndërsa civilët prisnin kamionët e ndihmës së OKB-së që hynin përmes pikës kufitare veriore të Zikim me Izraelin, raporton TheGuardian, transmeton KosovaPress.
Papa foli gjithashtu për dhimbjen e tij për sulmin izraelit ndaj kishës së vetme katolike të Gazës javën e kaluar, i cili vrau tre persona dhe plagosi 10. Midis të plagosurve ishte edhe famullitari, i cili merrte telefonata çdo ditë nga i ndjeri Papa Françesku.
Izraeli ka shprehur “pikëllim të thellë” dhe ka hapur një hetim për sulmin ndaj kishës, e cila strehonte rreth 600 persona të zhvendosur, shumica prej tyre fëmijë dhe shumë me nevoja të veçanta.
“Ky akt, për fat të keq, shton sulmet e vazhdueshme ushtarake kundër popullsisë civile dhe vendeve të adhurimit në Gaza”, tha Papa të dielën.
“I bëj thirrje bashkësisë ndërkombëtare të respektojë ligjin humanitar dhe të respektojë detyrimin për të mbrojtur civilët, si dhe ndalimin e ndëshkimit kolektiv, përdorimit pa dallim të forcës dhe zhvendosjes së detyruar të popullatave”, tha ai.
