Kandidatja për deputete nga Lidhja Demokratike e Kosovës, Shqipe Pantina, ka deklaruar se subjekti i saj politik ka reflektuar dhe nuk do të pengojë formimin e institucioneve të reja pas zgjedhjeve të 28 dhjetorit.
Në emisionin “Këndi i Debatit” në Tëvë1, Pantina ka theksuar se nëse formimi i ekzekutivit do të varej nga LDK-ja, kjo parti do të ndihmojë në këtë proces.
“LDK natyrisht se ka reflektuar dhe nuk do të jetë bllokuese e institucioneve të shtetit, dhe nëse varet krijimi i institucioneve të reja nga LDK-ja, do të ketë veprime të tilla që nuk do të jenë bllokuese”, ka thënë ajo.
Pantina ka sqaruar gjithashtu se kjo nuk nënkupton një bashkëpunim të drejtpërdrejtë me Lëvizjen Vetëvendosje, por se LDK-ja do të veprojë me maturi për të siguruar funksionimin e institucioneve të reja.
“Jo domosdoshmërisht gjithçka është bashkëpunim, thjesht nuk do të jemi bllokuese. Ne do të veprojmë me maturi për t’i dhënë Kosovës institucionet e reja. LDK-ja gjithmonë ka qenë më e orientuar drejt shtetit”, ka theksuar ajo.
E pyetur nëse kjo pohon se LDK-ja më parë ka qenë bllokuese, Pantina ka thënë se përgjegjësia kryesore i takon subjektit fitues dhe se qasja e LDK-së në të ardhmen do të jetë krejt ndryshe.
“Kur ke vullnet politik, gjithçka është e arritshme”, ka përfunduar ajo./teve1.info/
