Anëtarja e Lidhjes Demokratike të Kosovës, Shqipe Pantina, duke folur për nenin 7 të propozimit evropian për normalizimin e marrëdhënieve mes Kosovës dhe Serbisë, ka thënë se nga sjellja arrogante e kryeministrit, Albin Kurti ka ardhur situata që ai vetë të jetë para një akti që duhet ta pranojnë versionin më të keq të deritashëm.
Sipas saj, Kurti ka sjellje të papërgjegjshme edhe karshi aleatëve të vendit.
“Arroganca e tij, sjellja e tij krejtësisht e papërgjegjshme edhe në raport me komunitetet ndërkombëtare, sidomos me miqtë tanë ndërkombëtarë dhe ndërmjetësuesit, por edhe me opozitën në fund e ka sjellë atë para një akti kur ai është dashur të pranojë versionin të deri tashëm më të keq”, tha ajo në emisionin “Ditari” në Tëvë1.
Ajo ka thënë se me ketë arrogancë të Kurtit, Kosova ka ardhur në një pozitë “merre ose leje”.
“Kjo është si rezultat i arrogancës së tij, nuk e di pse e ka bërë se nuk ka dashur a po pse nuk ka ditur, por është kryekëput përgjegjësi e tij. E solli Kosovën, në një pozitë ‘merre ose leje’, sepse unë mendoj se mënyra ku kemi ardhur ne tani, secili liderë që do të ishte do ta kishte të vështirë të kundërshtonte diçka të tillë, por çka është dashur të bëhej ndryshe është i gjithë procesi të menaxhohet ndryshe dhe të mos lejohej që të vihet në atë pozitë kur ana konstruktive shihej Serbia, kurse ajo që po e pengonte procesin ishte Kosova, duke e ditur edhe nga e kaluara që konstruktiviteti ynë na ka sjellur neve përfitime dhe e ka dënuar Serbinë”, ka deklaruar Pantina.
Propozimi i plotë evropian i mbështetur nga ShBA për normalizimin e marrëdhënies mes Kosovës dhe Serbisë, konkretisht neni 7 thotë që: “Të dyja palët angazhohen të krijojnë marrëveshje dhe garanci specifike, në përputhje me instrumentet përkatëse të Këshillit të Evropës dhe duke u mbështetur në përvojat ekzistuese evropiane, për të siguruar një nivel të duhur të vetë-menaxhimit për komunitetin serb në Kosovë dhe aftësinë për ofrimin e shërbimeve në fusha specifike, duke përfshirë mundësinë e mbështetjes financiare nga Serbia dhe një kanal të drejtpërdrejtë komunikimi për komunitetin serb me Qeverinë e Kosovës”.
