Një aksident i rëndë trafiku ka ndodhur mëngjesin e sotëm në autostradën “Ibrahim Rugova”, ku janë përfshirë së paku dy automjete: një kamion me targa vendore dhe një veturë me targa të huaja.
Pamjet e siguruara nga vendi i ngjarjes tregojnë veturën tërësisht të dëmtuar, duke lënë të kuptohet për përplasjen e fuqishme.
Zëdhënësi i Policisë së Kosovës, Baki Kelani, ka konfirmuar për Tëvë1 se aksidenti ka rezultuar me fatalitet. Sipas tij, ngjarja ndodhi rreth orës 07:40, në kilometrin e 26-të të autostradës.
“Sot, rreth orës 07:40, në autostradën ‘Ibrahim Rugova’ ka ndodhur një aksident trafiku me pasoja fatale. Në këtë aksident kanë qenë të përfshira një mjet i rëndë transportues – kamion, me targa vendore, dhe një veturë me targa të huaja,” ka deklaruar Kelani.
Ai ka bërë të ditur se drejtuesja e veturës ka ndërruar jetë në vendin e ngjarjes, ndërsa drejtuesi i kamionit ka pësuar lëndime. “Vdekjen e viktimës e ka konstatuar ekipi mjekësor në vendin e ngjarjes,” ka shtuar ai.
Në vendin e aksidentit kanë intervenuar njësitë policore, zjarrfikësit dhe ekipet mjekësore, të cilat kanë punuar në menaxhimin e situatës dhe pastrimin e rrugës.
Policia e Kosovës u ka bërë thirrje të gjithë pjesëmarrësve në komunikacion që të respektojnë rregullat e trafikut dhe të tregojnë kujdes të shtuar gjatë vozitjes, sidomos në kushte të vështira atmosferike dhe në zonat me qarkullim të shpejtë.
