Pa helmeta e pa masa mbrojtëse.
Kështu u panë këtë të martën disa punëtorë në një objekt ndërtimi në Prishtinë.
E kjo gjendje, vuri në aksion një ditë më parë Inspektoratin Qendror të Punës.
Për këtë arsye, këta e ndaluan punën në plot 13 vendpunishte në Prishtinë dhe Fushë Kosovë.
Sipas tyre, deri te vendimi erdhi pasi gjatë inspektimeve u konstatuan shkelje të rënda të rregullave të sigurisë dhe shëndetit në punë.
“Gjatë këtyre inspektimeve janë konstatuar shkelje të rënda të dispozitave ligjore, të cilat paraqisnin rrezik serioz për jetën dhe shëndetin e punëtorëve. Për shkak të mungesës së masave të nevojshme të sigurisë në punë, Inspektorati Qendror i Punës ka marrë vendim për ndalimin e menjëhershëm të punimeve në 13 vendpunishte, deri në eliminimin e të gjitha parregullsive të evidentuara”, thuhet në njoftimin e Inspektoratiati Qendror të Punës
Se një përqindje e madhe e kompanive nuk po respektojnë ligjin, e thotë kryetari i Sindikatës së Sektorit Privat, Jusuf Azemi
“Mbi 90% e kompanive që punojnë në ndërtimtari nuk janë duke e respektuar ligjin mbi sigurinë dhe shëndetin në punë. Kjo në një farë forme e kemi bindjen që këta pronar të kompanive sikur nuk e kanë friken e ligjit dhe as të pushtetit apo dikujt tjetër dhe po veprojnë në konform të rregullave të veta”, u shpreh Azemi.
Azemi shton se jeta punëtorve, nuk po iu rrezikohet nga lartësia.
“Kur dje temperaturat kanë qenë mbi 35 gradë në rrugën Podujevë-Prishtinë janë ndërtim e sipër tri ura dhe në tri ura kanë qenë punëtorët të pa pajisur më pajisje adekuate. Në rend të parë nuk është dashtë të punohet në temperature 35 gradë, në rend të dytë nuk kanë pas pajisje aspak adekuate në punën që e bëjnë dhe në rend të tretë në temperaturë 35 grad dhe pikërisht në këtë kohë bëhej shtrimi i rrugës i cili sigurisht që e ka kaluar një temperature mbi 50 gradë është diçka që bënë me dije që nuk jemi duke ju përmbajt rregullave për sigurinë dhe shëndetin në punë” , theksoj tutje Azemi.
Sipas Azemit, vetëm këtë vit, 15 punëtorë kanë humbur jetën në vendin e punës, me shumicën e rasteve në sektorin e ndërtimtarisë.
