Policia e Kosovës, përmes Drejtorisë për Hetimin e Trafikimit me Narkotik, Njësia Gjilan, në koordinim me institucione të tjera të sigurisë, ka zbuluar një plantacion me bimë narkotike në një fshat të rajonit të Gjilanit.
Sipas njoftimit, plantacioni përbëhej nga katër sera ku ishin mbjellë rreth 500 bimë të llojit cannabis sativa, të cilat ndodheshin në një fazë të avancuar zhvillimi.
Policia thotë se gjatë aksionit janë sekuestruar edhe një armë e gjatë dhe dëshmi të tjera, ndërsa tre persona të dyshuar janë arrestuar dhe, me aktvendim të prokurorit, janë dërguar në mbajtje për 48 orë.
Ndërkohë është njoftuar se rasti është njoftuar tek prokurori kujdestar dhe të gjitha procedurat për shkatërrimin e lëndëve narkotike do të bëhen në koordinim me institucionet përkatëse. /teve1.info/
