Hapat i shpejtojnë nëpër sheshin “Xhorxh Bush”.
E destinacioni i tyre është tek semaforët në qendër të kryeqytetit.
Këta po mblidhen që të protestojnë për hapjen e kësaj rruge për qarkullim të automjeteve.
Kjo pasi që sipas tyre është bllokuar trafiku në Prishtinë.
Prandaj kundërshtimin e tyre po e shprehin përmes kësaj proteste, në të cilën u panë pak qytetarë.
“Kemi dalë me tregu budallallëkun që e ka bo një kryetar, që për fat të keq e di shumë mirë sepse është arkitekt dhe ka bërë një krim. Të bllokosh një aks rrugor në një vend ku nuk ka lezet të rrihet siç i ka bërë këto baraka këtu dhe e vonon trafikun me qindra orë dhe ku liron me qindra element gazrash, këto e bën për përfitime”, shprehet Asllan Bajrami
“Këtu nuk përngjan në qytet, këtu përngjan në mas lufte kur kemi qenë, kur është çliru Kosova ka qenë katrahurë. Këtu është rruga palidhje e bllokume, duhet alternativat të bëhen, duhet të bëhet zgjedhja, të pyeten qytetarët”, thotë qytetari Hamit Hoti.
Ata thonë se po presin me orë të tëra në komunikacion.
“Edhe për shoferët edhe kondukterat ngarkesë e madhe. Kallabllëk i madh bëhet në autobus, frymë s’mundesh me marrë. Duhet në qatë kallaballëk prej Rilindjes me prit ti katër orë” shprehet Ramize Curri që mori pjesë në protestë.
Prandaj thanë se janë të dëshpëruar me pjesëmarrjen jo të lartë të qytetarëve.
“Edhe praktikuesit fetar është dashtë me kon ktu. Edhe myslimanët edhe të krishterët”, tha Fatmir Muçolli.
Se sheshi ‘’Xhorxh Bush’’ duhet të shndërrohet në rrugë e thotë edhe deputetja nga radhët e Grupit Parlamentar të VV-së, Jeta Statovci e cila ishte në mesin e protestuesve.
“Nuk është që iu ka përgjigjur kërkesave dhe nevojave qytetare. Për festat e fundvitit ne e pamë që kishim një masë të gravituar këtu mirëpo i gjithë sheshi bazë kishte mbetë i zbrazët, në dëm të bizneseve dhe mobilitetit qytetar. Ndërsa gjatë gjithë pjesës tjetër të vitit, ne shohim se kjo po mbetet e zbrazët, pak e hiç qarkullim të qytetarëve, më shumë hapësirë për qentë endacak. Prandaj e konsiderojmë një projekt jo serioz dhe jo i menduar saktë”, tha ajo.
Ndërkohë, gjatë së shtunës, kryetari Përparim Rama prezantoi projektin për transformimin e bulevardit ‘’Xhorxh Bush’’
Rama theksoi se Bulevardi i kryeqytetit do të shndërrohet në një hapësirë urbane bashkëkohore dhe e cila reflekton mbrojtjen e jetës, promovon një stil të jetës së jetës, më shumë gjelbërim e ajër të pastër.
