Sot, është mbajtur mbledhja e 253-të e Këshillit Prokurorial të Kosovës. Në këtë mbledhje pati mospajtime në mes të ushtruesit të detyrës së Kryeprokurorit të Shtetit, Besim Kelmendi dhe Kryesuesit të Këshillit Prokurorial të Kosovës, Ardian Hajdaraj. Krejt kjo për shkak të pagave të anëtarëve joprokurorë.
Të martën u mbajt mbledhja e 253-të e Këshillit Prokurorial të Kosovës.
Në këtë takim ishin 10 anëtarë të Këshillit të pranishëm.
Kryesuesi i Këshillit Prokurorial të Kosovës, Ardian Hajdaraj, tha se pika e rendit të ditës që ka të bëjë me pagat e anëtarëve joprokurorë është vënë me propozim të ushtruesit të detyrës së Kryeprokurorit të Shtetit, Besim Kelmendi.
“Unë nuk shoh asnjë tendencë prej askujt, e filluam si debat sepse është temë edhe për me shqyrtu vendimin, e që nëse merrni pjesë në diskutim, atëherë duhet me qenë diskutim demokratik dhe duhet ndjekur procedurat demokratike”, tha Hajdaraj.
Por, Kryeprokurori i Shtetit, Besim Kelmendi e mohoj një gjë të tillë.
Ai ndër të tjera tha se askush nuk mund të jetë pa pagesë për punën që bënë.
“Në takimin e kaluar ekziston një proces verbal dhe ekziston një incizim të takimit dhe e di unë këtë çështje. Është diskutuar por nuk është marrë asnjë iniciativë për ta shqyrtuar këtë vendim. Kjo çështje është ngrit nga anëtari i Këshillit, Milot Krasniqi dhe pastaj e kam marrë fjalën unë”, ta Kelmendi.
E për këtë pikë të rendit të ditës, pati diskutime të shumta nga anëtarët e këshillit.
“Ne kemi punuar grup themelues prej 5 anëtarë të Këshillit, ai grup punues ka sjellë raport, ai raport ka kaluar në Këshill, ku është atëherë ideja e diskutimit”, tha Veton Shabani.
Në këtë mbledhje si pikë e rendit të ditës është vendosur edhe miratimi i Rregullores për Emërimin e Kryeprokurorit të Shtetit dhe Kryeprokurorëve të Prokurorive të Republikës së Kosovës.
Për këtë rregullore, Instituti i Kosovës për Drejtësi (IKD) kishte dërguar komente në KPK.
IKD gjenë se drafti i prezantuar për votim në KPK vazhdon të mos garantojë transparencë të duhur të procesit dhe krijon pabarazi mes anëtarëve të Këshillit, duke mos ndjekur standardet adekuate të miratuara nga Këshilli Gjyqësorë i Kosovës në raport me procesin e emërimit të kryetarëve të gjykatave.
Por KPK nuk mori për bazë rekomandimin e IKD dhe nuk ka ndjekur linjën e KGjK-së.
