Ish- ministri i Jashtëm i Kosovës, Behgjet Pacolli ka thënë se disa qytetarë të Kosovës janë kthyer nga Ukraina në pikën kufitare me Moldavinë.
Ai ka thënë se përveç që u është refuzuar hyrja ata janë ofenduar e maltretuar duke u quajtur terroristë
“Ka dhjetëra shtete që ende nuk e kanë njohur Kosovën, por pothuajse të gjitha u lejojnë qytetarëve tanë hyrjen me pasaportë kosovare. Sot, Ukraina ka kthyer shtetasit e Kosovës në pikën kufitare me Moldavinë – jo vetëm që i ka refuzuar, por i ka ofenduar dhe maltretuar, madje duke i quajtur “terroristë”. Ky nuk është rasti i parë: para disa vitesh, e njëjta Ukrainë veproi në mënyrë skandaloze me ekipin tonë kombëtar të futbollit, të cilët u detyruan të udhëtonin në Gjeorgji për të zhvilluar ndeshjen”, ka shkruar Pacolli në Facebook.
Ai duke kujtuar se Kosova po solidarizohet me Ukrainën, ka shtruar pyetje nëse duhet të shqyrtohet qëndrimet ndaj atyre siç ka thënë ai që nuk kanë respekt.
“Ne këtu në Kosovë vazhdojmë të tregojmë solidaritet dhe dhimbje për ta – ndërkohë që ata na poshtërojnë. A nuk është koha të rishqyrtojmë qëndrimet tona ndaj atyre që nuk na respektojnë as dinjitetin më minimal?”, ka shkruar Pacolli në Facebook.
