Deputetja e Lëvizjes Vetëvendosje, Fitore Pacolli, ka thënë se Bashkimi Evropian dhe Shtetet e Bashkuara të Amerikës duhet ta marrin seriozisht “Kuvendin gjithëserb”, i cili sipas saj shfaq ambiciet e hegjemonisë të Serbisë ndaj Kosovës dhe Bosnjë e Hercegovinës.
Pacolli ka thënë se BE e ShBA përveç reagimit duhet të marrin masa ndaj Serbisë për qasjen ndaj Kosovës dhe Serbisë.
“BE, SHBA duhet ta marrin seriozisht sepse aty nuk përfshinë vetëm Kosovën, por edhe Bosnjën . Aty cenohet marrëveshja e Dejtonit që ka sjellë paqen në Bosnje. Tregon ambiciet e hegjemonisë të Serbisë për shtrirje të pushtetit të cilat nuk i takojnë, kjo është Serbia e vërtetë dhe po shpresojmë që përveç reagimeve që kanë bë BE dhe SHBA të marrin masa ndaj qasje së sajë në raport me Kosovën dhe Bosnjën”, ka thënë ajo në emisionin “InfoNata” në Tëvë 1.
Pacolli ka folur edhe për reagimin e vendeve të QUINT-it, BE-së dhe OSBE-së, lidhur me shpronësimet në veri që sipas këtyre vendeve, vendimi është joligjor.
Sipas saj, ndërkombëtarët nuk do të duhej të reagonin, sepse vendimi ka qenë i drejtë.
“Akterët ndërkombëtar nuk do të duhej të reagonin sepse ne kemi ndjekur të gjitha procedurat ligjore, është e drejtë e Kosovës që të shpronësojë pronën aty ku i nevojitet për infrastrukturë publike.Qeveria shpronëson prona edhe në pjesët tjera të Kosovës, kështu që është diçka legjitime dhe nuk duhej të brengosemi në atë drejtim”, ka thënë ajo.
