Fitore Pacolli ka njoftuar se deri më tani përreth Liqenit të Ujmanit janë rrënuar 17 objekte.
Ministrja në detyrë e Mjedisit dhe Planifikimit Hapësinor ka shkruar se ky aksion do të vazhdojë dhe do të shtrihet edhe në pjesë të tjera të Kosovës.
“Vazhdon rrënimi i objekteve të ndërtuara pa leje në pronat publike në Ujman. Deri tash janë rrënuar 17 objekte/villa përreth Liqenit të Ujmanit. Ky aksion do të vazhdojë pa kompromis dhe do të shtrihet edhe në pjesë të tjera të Kosovës, me qëllim të mbrojtjes së pronës publike dhe zbatimit të ligjit”, ka shkruar në Facebook.
Përfaqësues të ndërmarrjes publike “Ibër-Lepenci”, të asistuar nga Policia e Kosovës të enjten rrënuan hotelin “Jezero” në pronën e kësaj ndërmarrje, përreth Liqenit të Ujmanit.
Ditë më parë, u rrënuan 11 vila të ngritura po ashtu ilegalisht në zonën e Ujmanit. Edhe ai veprim u mor me kërkesë të ndërmarrjes publike hidroekonomike “Ibër-Lepenci”, në pronën e së cilës u ngritën objektet.
