Ministrja në detyrë e Mjedisit dhe Planifikimit Hapësinor, Fitore Pacolli, ka kërkuar llogaridhënie të menjëhershme nga Komuna e Prishtinës pas aksidentit në një vendpunishte në rrugën “A”, ku si pasojë e rrëzimit të një vinçi një 26-vjeçar humbi jetën, ndërsa një 18-vjeçar mbeti i lënduar.
Pacolli ka shprehur ngushëllime për familjen e viktimës dhe ka uruar shërim të shpejtë për të lënduarin.
“Me trishtim dhe keqardhje të thellë mora lajmin tragjik për humbjen e një jete dhe lëndimin e rëndë të një qytetari sot në një kantier ndërtimi në Prishtinë. Ngushëllimet më të sinqerta familjes për këtë humbje të madhe, ndërsa të lënduarit i uroj shërim të shpejtë dhe të plotë”, ka shkruar Pacolli.
Ajo ka deklaruar se ky është incidenti i katërt me rrezik për jetë dhe dëmtim të pronës që ka ndodhur së fundmi në Prishtinë, duke kërkuar përgjegjësi institucionale.
“Ky është incidenti i katërt me rrezik jete dhe dëmtim prone që ndodh së fundmi pikërisht në Prishtinë, dhe është e papranueshme që askush nuk duket se po mendon për adresimin e përgjegjësisë”, ka deklaruar Pacolli.
Sipas saj, përgjegjësia kryesore për lejimin e ndërtimeve, mbikëqyrjen e sigurisë dhe parandalimin e rasteve të tilla bie mbi Inspektoratin Komunal të Ndërtimit dhe Komunën e Prishtinës.
“Në cilësinë e Ministres së Mjedisit dhe Planifikimit Hapësinor, theksoj se përgjegjësia kryesore dhe e drejtpërdrejtë për lejimin, mbikëqyrjen e sigurisë dhe parandalimin e këtyre rasteve bie mbi Inspektoratin Komunal të Ndërtimit dhe vetë Komunën e Prishtinës. Këto dështime të njëpasnjëshme të nivelit lokal kërkojnë llogaridhënie të menjëhershme dhe të pashmangshme”, ka thënë Pacolli.
Ajo ka bërë të ditur se ministria është duke verifikuar çdo lëshim të mundshëm dhe se do të kërkojë që çdo person përgjegjës për shkelje të japë llogari para ligjit.
Pacolli gjithashtu u ka bërë thirrje odave profesionale që të vlerësojnë nëse ka pasur mungesë profesionalizmi dhe, në rast se konstatohen shkelje, të ndërmerren masa disiplinore, përfshirë edhe revokimin e licencave për profesionistët përgjegjës.
“Siguria e qytetarëve, pronës dhe standardeve të ndërtimit është e panegociueshme. Nuk do të ketë kompromis me askënd”, ka përfunduar Pacolli.
