Kreu i Aleancës Kosova e Re (AKR), Behgjet Pacolli vlerëson se Qeveria Kurti ka dy-tre ministra të cilët punojnë shumë.
Siç thotë ai, nëse e gjithë Qeveria do të punonte si ata, situata në vend do të ishte krejt tjetër.
“Ka disa, dy-tre ministra në Qeverinë e Kurtit të cilët unë i admiroj shumë, janë punëtorë shumë dhe e shoh që ata punojnë dhe do të doja shumë që komplet Qeveria të punojë si ata dhe sigurisht me një punë të tillë do të kishim një situatë krejtësisht tjetër”, deklaroi ai në “Info Nata” në Tëvë 1, teksa nuk bëri të ditur cilët janë ata.
Ish-presidenti Pacolli po ashtu ftoi opozitën që të mos kërkojnë nga Qeveria gjëra të cilat, sipas tij, kjo e fundit nuk mundet t’i bëjë.
“Do të rekomandoja edhe opozitën që të kuptojë situatën e krijuar, mos të kërkojë edhe nga Qeveria diçka që Qeveria nuk mundet me bë. Kurse Qeveria duhet të gjejë rrugën më të mirë që ky shtet të ec përpara, që këta të rinj këtu në Kosovë që kanë mbetur të kenë një perspektivë dhe ajo arrihet besoni edhe njëherë vetëm me punë”, shtoi ai. /Teve1.info/
