Autori: Adea Mustafaj
Është mjeti i vetëm më të cilin mund ta kalojë urën.
Por, as më të, kalimin në anën tjetër të urës, nuk e ka të sigurt ky qytetar.
Kjo meqë vërshimet e janarit, dëmtuan rëndë urën në rrugën “Bekim Kastrati” në Drenas.
Por, pavarësisht rrezikut, mbi të po detyrohen të kalojnë qytetarët.
E dikush tjetër, po detyrohet ta zgjedh opsionin më të sigurt.
“Po neve na ngakon me shku ma larg se shkojna rrotull. Dikun një kilometer e gjysmë. Tash shkom rrotull anej dhe dalim në qendër… Edhe bizneset i ka blloku. Kanë pas punë ma shumë tash s’kan hiq.”, u shpreh një qytetar
“Ura është qysh po e shihni edhe ju qysh është, po s’ka intervene kërkush kurgjo. Ka pengesa se njerzt po duhet me shku Kashakollë i bjen 4-5 kilometra knej anej ose duhet me shku knej për Shtrubullovë ose me shku krej anën e kundërt.”, ka thënë qytetari tjetër.
E kalimin mbi këtë urë të dëmtuar rëndë, duket se do të detyrohen ta bëjnë edhe për një kohë këta qytetarë.
Kjo meqë nga Komuna e Drenasit, thonë se për këtë projekt duhet të pritet miratimi i buxhetit në Kuvendin e Kosovës.
“Në perspektivë afatmesme dhe afatgjatë, kjo urë do të trajtohet si projekt i ri, duke u planifikuar dhe ndërtuar sipas standardeve bashkëkohore të sigurisë. Megjithatë, pa miratimin e buxhetit nga Kuvendi i Republikës së Kosovës, nuk kemi mundësi të vazhdojmë me procedurat tenderuese për realizimin e këtij projekti. Deri në sigurimin e mjeteve financiare, institucionet përkatëse do të shqyrtojnë dhe analizojnë mundësitë për një zgjidhje të përkohshme, përfshirë edhe mbështetjen eventuale të Forcës së Sigurisë së Kosovës (FSK), me qëllim të lehtësimit të qarkullimit dhe garantimit të sigurisë për qytetarët.”, ka thënë Gllareva.
Ndryshe, ura e dëmtuar lidh edhe fshatrat Shtrubullovë dhe Krajkovë.
