Prokuroria Themelore në Mitrovicë, Departamenti i Krimeve të Rënda, ka ngritur aktakuzë ndaj të pandehurit me inicialet N.S., për veprën penale “Ngasja në gjendje të paaftë apo të dehur”, nga neni 371, paragrafi 4, i Kodit Penal të Republikës së Kosovës.
Sipas njoftimit të Prokurorisë, rasti ka të bëjë me një aksident trafiku të ndodhur më 23 korrik 2026, në rrugën nacionale Mitrovicë–Prishtinë.
Sipas aktakuzës, N.S. dyshohet se ka drejtuar automjetin pa patentë shoferi dhe nën ndikimin e alkoolit. Gjatë lëvizjes, ai dyshohet se ka kaluar në krahun dhe shiritin e kundërt të rrugës, ku më pas ka goditur një automjet që ishte duke lëvizur në drejtimin e rregullt.
Si pasojë e aksidentit, ka humbur jetën pasagjerja M.V., ndërsa tre pasagjerë të tjerë kanë pësuar lëndime trupore. Në aksident janë shkaktuar edhe dëme materiale në automjete dhe në mbrojtëset e rrugës.
Me rastin e ngritjes së aktakuzës, Prokuroria Themelore në Mitrovicë ka kërkuar nga Gjykata Themelore në Mitrovicë që i pandehuri të shpallet fajtor për veprën penale për të cilën akuzohet dhe të dënohet sipas ligjit.
N.S. konsiderohet i pafajshëm derisa fajësia e tij të vërtetohet me një vendim të formës së prerë të gjykatës.
