Organizata e Veteranëve të Luftës së UÇK-së ka shprehur shqetësim për siç kanë thënë trajtimin e padrejtë dhe poshtërues të Dhomave të Specializuara të Kosovës ndaj ish krerëve të UÇK-së të cilët po mbahen në paraburgim.
Sipas OVL refuzimi i vizitës së Avokatit të Popullit nga Hashim Thaçi, Kadri Veseli, Rexhep Selimi dhe Jakup Krasniqi, pasqyron qartë nivelin e zhgënjimit dhe mospërfilljes që kanë përjetuar ata ndaj këtij institucioni.
“Qëndrimi i tyre është një mesazh i fuqishëm se kjo gjendje nuk mund të normalizohet dhe as të justifikohet”, thuhet në reagim.
Më tej thuhet se kufizimet ekstreme në takimet me avokatët dhe ndërhyrjet arbitrare në përgatitjen e mbrojtjes ligjore përbëjnë cenim të drejtave themelore të njeriut dhe shkelje të rënda të së drejtës për një proces të drejtë gjyqësor.
“Siç është raportuar në media, takimet po organizohen në mënyrë të papritur dhe në kushte të papërshtatshme, duke penguar seriozisht funksionimin efektiv të mbrojtjes”, theksohet në reagim.
Këto shqetësime theksohet se i ka ngritur edhe Avokati i Popullit i Kosovës, i cili ka deklaruar publikisht se mbajtja e gjatë në paraburgim dhe mungesa e vendimeve të drejta për lirimin e përkohshëm bien ndesh me standardet ndërkombëtare për të drejtat e njeriut dhe e përbëjnë trajtim jo të dinjitetshëm.
OVL-UÇK ka bërë thirrje që të përfundojë menjëherë trajtimi çnjerëzor dhe poshtërues i të paraburgosurve, të garantohen pa vonesë të gjitha të drejtat e tyre, përfshirë qasjen e plotë dhe të pandërprerë në mbrojtje ligjore, Avokati i Popullit i Dhomave të Specializuara të mbajë qëndrim publik ndaj shkeljeve dhe të mos bëhet palë në heshtje me një sistem të padrejtë, si dhe të bëhet rishikim i menjëhershëm i kushteve të paraburgimit dhe të shqyrtohet seriozisht mundësia e lirimit të përkohshëm të tyre.
“Luftëtarët e UÇK-së nuk kanë luftuar për drejtësi të njëanshme, për paraburgime pa fund dhe për t’u poshtëruar në emër të një drejtësie që hesht përballë padrejtësisë. Drejtësia e vërtetë fillon me respektimin e dinjitetit njerëzor”, thuhet në fund të reagimit.
