Organizata e Veteranëve të Luftës së Ushtrisë Çlirimtare të Kosovës (OVL-UÇK) ka shprehur mbështetjen për protestën e studentëve shqiptarë që po mbahet në Shkup lidhur me kërkesën për organizimin e provimit të Jurisprudencës në gjuhën shqipe.
Përmes një reagimi publik, OVL-UÇK vlerësoi se kërkesat e studentëve janë të drejta dhe lidhen me dinjitetin dhe barazinë e gjuhës shqipe në institucionet shtetërore.
“Mbështesim plotësisht studentët shqiptarë në Maqedoninë e Veriut, të cilët po kërkojnë status të barabartë për gjuhën dhe identitetin shqiptar. Zëri i tyre është legjitim dhe kauza e tyre është e drejtë”, thuhet në reagimin e organizatës.
OVL-UÇK theksoi se përdorimi i gjuhës shqipe është një e drejtë e patjetërsueshme dhe kërkoi që institucionet përgjegjëse të respektojnë këto të drejta pa kushte dhe pa vonesa.
