Kryetari i Kuvendit të Kosovës, Dimal Basha, ka reaguar për herë të parë pas publikimit të një artikulli që përmend Ushtrinë Çlirimtare të Kosovës (UÇK), e që sipas tij është pjesë e një teme të trajtuar gjatë studimeve të tij jashtë vendit.
Në një konferencë për media, Basha u shpreh se është përgjegjës vetëm për pjesën që ka shkruar vetë dhe mohoi lidhjen me çdo përmbajtje tjetër që ka të bëjë me UÇK-në.
“Artikulli është pjesë e një projekti studimor. Jam përgjegjës vetëm për pjesën time dhe për asnjë fjalë tjetër ku përmendet UÇK-ja,” tha Basha.
Ndërkohë, reagimi më i ashpër ka ardhur nga Organizata e Veteranëve të Luftës së UÇK-së (OVL-UÇK). Gjatë një konference për media, kryetari i kësaj organizate, Hysni Gucati, ka kërkuar shkarkimin e menjëhershëm të Dimal Bashës nga posti i kryetarit të Kuvendit dhe nisjen e hetimeve nga Prokuroria.
“Kërkojmë nga deputetët e Kuvendit shkarkimin e menjëhershëm të z. Dimal Basha dhe nisjen e hetimeve nga Prokuroria ndaj tij. Ne si OVL obligohemi të marrim veprime të tjera nëse nuk realizohen kërkesat tona,” deklaroi Gucati.
Ai gjithashtu theksoi se Kryetari i Kuvendit nuk është më i mirëpritur në ambientet e OVL-UÇK-së.
“Z. Basha nuk i ka dyert e hapura në OVL-UÇK,” u shpreh Gucati.
