Veteranët e Ushtrisë Çlirimtare të Kosovës po kërkojnë procedim të shpejt të Projektligjit për ndryshim dhe plotësim të ligjit për Dhomat e Specializuara.
Në një konferencë për media, nënkryetari i organizatës që I përfaqëson ish-luftëtarët, Gazmend Syla tha se pas miratimit të deklaratës në Kuvend, duhet të vijohet me veprim.
“Kuvendi dhe deputetët e bënë pjesën e tyre e dëshmuan vullnetin politik me votë. Qeveria duhet ta procedojë sa më parë projektligjin në mënyrë që ai të vijë menjëherë në Kuvend për miratim. Projektligji për ndryshim dhe plotësim të ligjit për Dhomat e Specializuara nuk duhet të vonohet. Deklarata është zotim, ligji është veprim. Ata që sot i kanë duart e lidhura në Hagë kanë nevojë për veprime konkrete. Nëse vendi shkon në zgjedhje pa u miratuar, Kuvendi është përgjegjësia për të miratuar këtë ligj. Përgjegjësia politike për mosprocedim të tij duhet të jetë e qartë edhe e specifikuar”, tha Syla.
Syla u tha gazetarëvce se tashmë janë bërë të gjitha përgatitjet për marshin e 1 tetorit, në mbështetje të idh-drejtuesve të UÇK-së dhe kundër aktgjykimit të Speciales.
“I kemi bërë të gjitha përgatitjet për marshin e datës 1 tetor, i cili do të mbahet në sheshin “Skënderbeu” në ora 16:00. Nga këtu menjëherë ju bëjmë thirrje të gjitha kategorive të dala nga lufta e UÇK-së, por edhe të gjithë qytetarëve që ndjejnë që kjo padrejtësi e datës 6 shtator ka cenuar luftën tonë të drejtë dhe shtetësinë e Kosovës, që me datën 1 tetor duhet të jenë në sheshin “Skënderbeu””, tha ai.
Nënkryetari I veteranëve u zotua se të tilla organizime do të ketë nga OVL-UÇK, deri në momentin kur ish-krerët e UÇK-së të kthehën në Kosovë.
“Do të ketë organizime të tilla nga OVL-UÇK deri ditën sa bashkëluftëtarët tanë do të kthehen në shtëpitë e tyre të pafajshëm. Do të thotë ajo ka qenë një farë forme nxemje e kësaj çka ka me ndodh më 17 dhjetor. Edhe i kemi dhënë mundësinë shumë bashkëluftëtarëve tanë, por edhe plot qytetarëve tanë të cilët me mungesë të kushteve financiare nuk kanë pasur mundësi me ardhur në Prishtinë në protestën që po ndodh në ora 21:00 këtu, i kemi dhënë mundësinë që edhe në njëfarë forme t’ia decentralizojmë protestën që me pasur mundësi me marrë pjesë edhe ata në për sheshet e qyteteve tona që i kanë më afër atje. Por sido që të jetë, edhe pas datës 17 do të jemi të gatshëm me vazhduar me aktivitetet tona kundër kësaj padrejtësie deri sa zëri jonë t’u mbërrijë në ata veshë që duhet me u dëgjuar pra për këtë padrejtësi që ka ndodhur me datën 6 shtator”, shtoi ai.
