OVL e UÇK-së bën të ditur se do të marrin pjesë në protestën e organizuar nga Partia Socialdemokrate më 29 nëntor, për të kundërshtuar vizitën e kryetares së Dhomave të Specializuara të Kosovës (DHSK), Ekaterina Trendafilova.
Kështu bëri të ditur ushtruesi i detyrës së OVL-UÇK-së, Faton Klinaku, përcjell teve1.info
Siç thotë ai, Trendafilova do duhej të bënte diçka “rreth shkeljes së vazhdueshme të të drejtave të burgosurve”, sesa sipas tij, të vjen në Kosovë.
“Kryetarja e DhSK-së, sa vjen në Kosovë, do të duhej që të bëj diçka rreth shkeljes së vazhdueshme të të drejtave të paraburgosurve, siç ka ndodhur edhe kohëve të fundit që ata u janë nënshtruar disa kufizimeve, e më e rënda prej tyre ishte komunikimi dhe ndërprerja e vizitave me familjarët dhe personat tjerë. Prandaj, edhe për shumë arsye të tjera, mbështesim dhe marrim pjesë në protestën e organizuar nga PSD më datën 29.11.2023, për të kundërshtuar vizitën e znj. Ekaterina Trendafilova”, ka shkruar Klinaku në Facebook.
PSD-ja ka paralajmëruar se nuk do të lejojë Trendafilovën të zhvillojë aktivitetin e saj, në vizitën e saj në Kosovë në fund të këtij nëntorit.
Gjatë qëndrimit në Kosovë, Trendafilova do të mbajë një takim me përfaqësues të shoqërisë civile në Prishtinë në kuadër të Programit për Komunikim dhe Ndërgjegjësim.
Ardhja e saj në Kosovë ishte pritur me protesta edhe në shtatorin e vitit të kaluar. /Teve1.info/
