Organizata e Veteranëve të Luftës së UÇK-së (OVL-UÇK) ka shprehur mbështetjen e saj për propozimin e ish-komandantit të UÇK-së dhe ish-kryeministrit Ramush Haradinaj, që Hashim Thaçi, pas kthimit në Kosovë, të rimarrë mandatin nga Kuvendi dhe të zgjidhet President i Republikës së Kosovës.
Sipas OVL-UÇK-së, ky propozim ka rëndësi të veçantë kombëtare dhe institucionale, duke e cilësuar atë si një mundësi që mund t’i shërbejë unitetit dhe stabilitetit institucional në vend.
“Roli i Hashim Thaçit gjatë luftës çlirimtare, si dhe përgjegjësitë e tij institucionale në proceset shtetformuese dhe shtetndërtuese, përbëjnë një faktor të rëndësishëm për vazhdimin e rrugëtimit të Kosovës në bashkëpunim me aleatët tanë strategjikë”, thuhet në komunikatën e OVL-UÇK-së.
Organizata vlerëson se kthimi i Thaçit duhet të pritet me dinjitet institucional dhe të trajtohet përmes zgjidhjeve të ligjshme, në mënyrë që situata aktuale dhe vakumi institucional të mos ndikojnë negativisht në të ardhmen e vendit.
OVL-UÇK u ka bërë thirrje institucioneve dhe subjekteve politike në Kosovë që ta shqyrtojnë me seriozitet propozimin e Haradinajt, duke e vendosur interesin e shtetit mbi dallimet dhe interesat partiake.
“Sot, më shumë se kurrë, Kosova ka nevojë që të mbizotërojnë interesi kombëtar, dinjiteti dhe siguria e shtetit. Në këtë rrugëtim nuk duhet të anashkalohet asnjëherë nderimi dhe respekti për ata që luftuan, sakrifikuan dhe kontribuuan në fitimin e lirisë dhe shtetësisë së Kosovës”, përfundon komunikata.
