Presidentja e Kosovës, Vjosa Osmani, është takuar me zëvendësdrejtorin menaxhues për Evropë në Shërbimin Evropian të Veprimit të Jashtëm të BE-së, Marko Makovec.
Në këtë takim është diskutuar për sulmin terrorist të 24 shtatorit, që sipas njoftimit të Presidencës së Kosovës, Osmani ka vënë theksin që Serbia të mbahet përgjegjëse përmes masave konkrete nga BE-ja.
“Ajo nënvizoi se parandalimi i përpjekjeve të vazhdueshme të Serbisë për destabilizim të të gjithë rajonit tonë është kyç”, thuhet në njoftim, raporton teve1.info
Tutje, presidentja e Kosovës ka thënë se sulmi ishte i përgatitur dhe i orkestruar nga Serbia.
“Presidentja theksoi se ky sulm ishte i përgatitur dhe i orkestruar nga Serbia, dhe i ekzekutuar nga grupe terroriste e paramilitare, gjë që e dëshmojnë dëshmitë e shumta të siguruara nga institucionet tona të sigurisë”, thuhet tutje në njoftim.
Gjithashtu, në njoftim thuhet se Osmani riafirmoi përkushtimin e plotë Kosovës që të punojë ngushtë me partnerët e saj për t’i tejkaluar sfidat e krijuara nga ky akt i agresionit.
“Presidentja Osmani riafirmoi përkushtimin e plotë të Republikës së Kosovës që të punojë ngushtë me partnerët e saj për t’i tejkaluar sfidat e krijuara nga ky akt i agresionit, duke përmendur bashkëpunimin e vazhdueshëm të institucioneve tona me ato ndërkombëtare e sidomos ato të sigurisë, përfshirë EULEX-in”, u tha në njoftim.
Ndërkaq, edhe zëvendëskryeministri i Kosovës, Besnik Bislimi është takuar me Makovec, ku edhe gjatë atij takimi është diskutuar për sulmin e 24 shtatorit./teve1.info/
