Presidentja e Kosovës, Vjosa Osmani ka thënë se zgjerimi i BE-së do të kontribuojë në paqen dhe sigurinë në rajon.
Ajo pas pranimit të Raportit të Progresit nga Shefin e Zyrës së Bashkimit Evropian në Kosovë, Ambasadorin Aivo Orav, shprehu përkushtimin e Kosovës për integrim në BE.
“Raporti i sivjetshëm vlerëson pozitivisht progresin e Kosovës në disa fusha, si dhe identifikon sfida në disa fusha të tjera. Me këtë rast, Presidentja Osmani theksoi se Republika e Kosovës mbetet e palëkundur në përkushtimin e saj për integrimin në BE. Në këtë frymë, Presidentja Osmani u shpreh se zgjerimi i BE-së do të kontribuojë jo vetëm në prosperitetin dhe zhvillimin e qëndrueshëm të Kosovës, por edhe në paqen dhe sigurinë afatgjatë në rajon dhe më gjerë”, tha Osmani thuhet në komunikatën e Presidencës.
Osmani deklaroi se Kosova vazhdon të jetë në ballë të reformave dhe është plotësisht e harmonizuar me politikën e jashtme dhe të sigurisë së BE-së, një element që është theksuar edhe në raport.
Sa i përket të gjeturave të raportit, presidentja tha se gjetjet duhet të trajtohen me prioritet.
“Në takim u diskutuan edhe gjetjet e raportit, të cilat nënvizojnë nevojën për adresimin e mospërputhjeve në fusha të caktuara. Presidentja theksoi se këto gjetje duhet të trajtohen me prioritet, me qëllim të avancimit të vazhdueshëm të demokracisë dhe sundimit të ligjit. Presidentja potencoi se është shumë me rëndësi që raporti ka ritheksuar nevojën e përsëritjes së procesit të zgjedhjes së Kryeprokurorit, duke respektuar parimet e transparencës dhe meritokracisë”, thuhet në komunikatë./teve1.info/
