Ish-presidentja e Kosovës, Vjosa Osmani, vizitoi sot familjen e policit të rënë në detyrë, Afrim Bunjaku, pas vendimit të gjykatës për dënimin e të akuzuarve në rastin e sulmit në Banjskë.
Gjatë vizitës, Osmani theksoi se sakrifica për shtetin e Kosovës mbetet e vazhdueshme dhe kërkon përkushtim të përditshëm nga të gjithë qytetarët.
“Dëshmon se sakrifica për këtë vend nuk ka mbaruar ende. Edhe pse kemi kaluar shumë vite nga çlirimi dhe shpallja e pavarësisë, liria duhet të ruhet çdo ditë. Lum Kosova që ka pasur djem si Afrim Bunjaku, që i kanë dalë zot vendit në çdo kohë. Është gjaku i tij, sakrifica e tij dhe sakrifica e juaj si familje, dhe e shumë familjeve në Kosovë, që janë arsyeja pse Kosova sot është vend sovran në çdo centimetër të saj”, tha Osmani.
Ajo tha se fatkeqësisht e kemi një fqinj që prej shumë shekujsh ka sjellë probleme, por që sipas saj çizma e Serbisë nuk do të shkel më këtej.
“Mbi të gjitha, amaneti i tij dhe i shumë djemve e vajzave që kanë dhënë jetën për këtë vend do të jetojë përherë. Këtë ju siguroj: keni fëmijë të jashtëzakonshëm, me të cilët jemi takuar dhe i kemi pritur, edhe djem edhe vajza, që vazhdojnë me ju bërë krenarë duke vazhduar rrugën e babait të tyre. Jam e bindur se edhe nipat e mbesat do ta vazhdojnë këtë rrugë për ta bërë këtë vend krenar”, tha ajo.
Ish-presidentja shtoi se sakrifica e Bunjakut dhe e familjes së tij si dhe e shumë familjeve të tjera në Kosovë, është themeli i sovranitetit të vendit. Sipas saj, drejtësia për këtë rast ende nuk është e plotë.
“Duhet që Milan Radoiçiç të dorëzohet në Kosovë dhe të marrë dënimin e merituar, si dhe shumë kriminelë të tjerë që kanë vepruar nën urdhrin e Aleksandar Vuçiqit. Ky është vetëm hapi i parë i drejtësisë për heroin Afrim. Por në këto momente të rënda që i kemi përjetuar si shtet, na kanë qëndruar pranë miqtë tanë dhe na kanë ndihmuar edhe Amerika dhe shtetet e tjera, jo vetëm atë ditë, por edhe në ditët kur janë bërë hetimet për rastin e Banjskës. Tash e kemi këtë vendim që është hapi i parë i drejtësisë për heroin Afrim dhe për ju si familje”, tha ajo.
Xhaxhai i heroit Afrim Bunjaku, Gani Bunjaku kujtoi përkushtimin e tij ndaj mbrojtjes së vendit, duke shtuar se ai gjithmonë kishte theksuar rëndësinë e mbrojtjes së territorit të Kosovës.
“Kur s’e mbrojmë tokën tonë, s’ka kuptim të shkojmë ta mbrojmë diku tjetër. Tokën tonë duhet ta mbrojmë”.
Gani Bunjhaku tha se deri në pikën e fundit të gjakut, çdo shqiptar duhet të derdh në këtë tokë.
“Boll kemi derdhur, por për ta mbrojtur, Mitrovica është shpirti ynë”, kishte thënë heroi Afrim Bunjaku, sipas familjarëve.
Bunjaku shprehu shqetësimin për deklaratat publike që janë bërë në Kuvendin e Kosovës si dhe tha për Vjosa Osmanin se Kosvës i duhen njerëz të tillë.
“Pas vetes na ke me shpirt, me zemër dhe me mendje. Na duhen njerëz të tillë. Për të ecur përpara duhet njerëz adekuatë në pozicionet e tyre, që të ecim mbarë e mirë”, tha ai.
Gjykata Themelore të Prishtinë sot ka shpallur aktgjykim dënues me burgim të përjetshëm ndaj Blagoje Spasojeviqit dhe Vladimir Toliqit, të cilët u shpallën fajtorë për sulmin terrorist në Banjskë të Zveçanit, që ndodhi më 24 shtator 2023. Ndërsa me 30 vjet burgim u dënua Dushan Maksimoviq. Si pasojë e këtij sulmi mbeti i vrarë rreshteri policor, Afrim Bunjaku, ndërsa u plagosën tre të tjerë.
