Presidentja e vendit, Vjosa Osmani ka thënë se veprimet e Policisë së Kosovës ndaj strukturave ilegale në veri janë legjitime.
Sipas saj, suksesi i veprimeve të Kosovës në mbrojtje të qytetarëve varet njëkohësisht edhe nga koordinimi me aleatët, përcjell teve.info
Osmani po ashtu ka theksuar se sovraniteti dhe integriteti territorial i Kosovës është i pacenueshëm, i patjetërsueshëm dhe i pandashëm.
“Veprimet e Policisë së Kosovës ndaj strukturave ilegale e bandave kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim. Qëndrueshmëria, jetëgjatësia dhe suksesi i këtyre veprimeve varen njëkohësisht edhe nga koordinimi me aleatët që ishin dhe mbeten garantues të sovranitetit dhe pavarësisë sonë. Bashkë, jemi gjithnjë më të fortë!”, ka shkruar ajo në Facebook.
Situata në veri është tensionuar që nga mesdita e sotme, si shenjë pakënaqësie nga serbët lokal pas betimit që kanë bërë dje kryetarët e komunave në Leposaviq, Zubin Potok, dhe Zveçan.
Në këto protesta janë lënduar pesë pjesëtarë të Policisë së Kosovës, derisa janë dëmtuar 4 vetura.
Bashkimi Evropian ka dënuar fuqishëm situatën e krijuar në veri të vendit, teksa kanë bërë të ditur se nuk do pranojnë asnjë veprim të mëtejshëm të njëanshëm dhe provokues.
Reagim për situatën në veri ka pasur edhe nga Shtetet e Bashkuara të Amerikës.
Ambasadori amerikan, Jeff Hovenier ka thënë se masat e sotme të dhunshme duhet të ndërpriten menjëherë. Ai po ashtu ka deklaruar se SHBA-ja dënon “veprimet e vazhdueshme të autoriteteve kosovare për të hyrë në ndërtesat komunale në veri të Kosovës”. /Teve1.info/
