Presidentja e Kosovës, Vjosa Osmani, edhe sot (e enjte) po qëndron në Maqedoni të Veriut.
Sipas agjendës, nga ora 10:20 ajo do të mbajë fjalë rasti para stafit akademik dhe studentëve në Institutin e Trashëgimisë Shpirtërore e Kulturore të Shqiptarëve në Shkup.
Presidentja Osmani sot pritet që ta vizitojë edhe Tetovën.
Presidentja dje tha se Kosova dhe Maqedonia e Veriut ndajnë raporte të shkëlqyera bilaterale.
Osmani tutje pas takimit me kryeministrin maqedonas Dimitar Kovacevski, tha se u dakorduan për zgjerim të bashkëpunimit mes të dyja vendeve.
“Kosova dhe Maqedonia e Veriut ndajnë raporte të shkëlqyera bilaterale, të ndërtuara mbi vlerat e përbashkëta demokratike dhe të forcuara nga përkushtimi ynë për të ardhmen tonë evropiane. Sot me kryeministrin Dimitar Kovacevski, u dakorduam ta zgjerojmë bashkëpunimin tonë dypalësh për t’i afruar edhe më shumë qytetarët tanë”, shkroi Osmani në Facebook.
