Presidentja e Kosovës, Vjosa Osmani ka thënë se mirëpret vendimin e Bashkimit Evropian për heqjen e pjesshme të masave ndaj Kosovës, ndërsa ka thënë se do të punojnë që ato të hiqen në tërësi.
Ajo kështu është shprehur në një postim në Facebook ku ka njoftuar se është pritur në takim nga Presidenti i Këshillit të Bashkimit Evropian, António Costa.
“Mirëpresim vendimin e BE-së për heqjen e pjesshme të masave, përderisa shpresojmë e punojmë që, sa më parë, ato të hiqen në tërësi. Republika e Kosovës ka dëshmuar konstruktivitet, bashkëpunim e përputhshmëri të plotë me politikën e jashtme e të sigurisë të Bashkimit Evropian”, ka shkruar ajo.
Osmani ka thënë se Kosova ka plotësuar të gjitha kushtet e vendosura nga BE dhe sipas saj nuk ka asnjë arsye të shtyhet heqja e tërsishme e masave.
“Në takim potencova se Kosova ka përmbushur të gjitha kushtet e përcaktuara nga vetë BE, sado që ato ishin të padrejta, prandaj nuk ka asnjë arsye që të pengohet e shtyhet heqja e masave të tjera të mbetura. Në anën tjetër, shpresojmë që sa më parë, të kemi përkrahjen e të gjitha shteteve anëtare që edhe Kosova, bazuar në merita, të marrë statusin e kandidatit për anëtarësim në Bashkimin Evropian”, tha ajo.
Heqja e 50% të masave nga BE-ja do t’i sjellë Kosovës rreth 216 milionë euro
