Ajo ka thënë se tri marrëveshjet e nënshkruara do të ndikojnë në heqjen e barrierave.
“Marrëveshjet për lëvizjen e lirë me karta identiteti për shtetasit e rajonit, njohja e diplomave universitare, dhe njohja e kualifikimeve profesionale të mjekëve, dentistëve dhe arkitektëve, do të kontribuojnë në forcimin e bashkëpunimit rajonal dhe në heqjen e barrierave administrative në mes të shteteve të Ballkanit Perëndimor, duke u afruar edhe më shumë vlerat dhe praktikat evropiane të bashkëpunimit”, ka thënë Osmani.
Presidentja ka falënderuar kancelarin federal të Gjermanisë, Olaf Scholz, si dhe udhëheqësit e Bashkimit Evropian, për përkushtimin e tyre ndaj integrimit evropian të Kosovës dhe Ballkanit Perëndimor, duke theksuar se Kosova do të vazhdojë të mbetet palë plotësisht e përkushtuar ndaj Procesit të Berlinit dhe bashkëpunimit rajonal në frymën e barabarësisë.
Nga këto marrëveshje të nënshkruara qytetarët e Kosovës dhe Bosnjë e Hercegovinës do të mund të lëvzin vetëm me letërnjoftime në dy shtetet përkatëse.
Kosova në Samitin e Berlinit po përfaqësohet nga kryeministri Albin Kurti./teve1.info/
