Presidentja e Kosovës, Vjosa Osmani, ka thënë se institucionet e Kosovës janë shumë të kujdesshme sa i përket propozimit franko-gjerman i cili ka marrë mbështetjen e vendeve të BE-së dhe ShBA-së.
Ajo në një intervistë për mediumin austriak “Profil”, thotë se Serbisë i ofrohet një “vetëqeverisje të serbëve” si shkëmbim për njohjen e Kosovës.
Osmani ka thënë se BE ka përdoru gjuhë të paqartë në këtë propozim që lë interpretime të ndryshme nga palët.
“Propozimin e morëm në formë të shtypur. Janë katër ose pesë faqe. Për disa, kjo mund të jetë thjesht një copë letër. Por kjo ka të bëjë me të ardhmen e fëmijëve tanë. Ne duam që ata të rriten në Kosovë pa pasur nevojë të kalojnë atë që kemi kaluar. Kjo është arsyeja pse ne jemi jashtëzakonisht të kujdesshëm kur bëhet fjalë për këtë propozim. Nëse ulem me tre avokatë, do të marr të paktën dhjetë mendime të ndryshme se çfarë do të thotë kjo në praktikë. BE-së i pëlqen të përdorë një gjuhë të paqartë në mënyrë që të dyja palët të mund t’i interpretojnë marrëveshjet ashtu siç e shohin të arsyeshme. Duhet ta lëmë pas këtë strategji. Sepse ne jemi ata që duhet të jetojmë me pasojat”, ka thënë ajo.
Osmani ka thënë se nuk beson shumë që Vuçiq do të nënshkruajë marrëveshje, ndërsa ka kritikuar BE-në se nuk bënë presion ndaj tij.
“Nuk kam shumë shpresa për Vuçiqin. Nuk po them se nuk do të nënshkruajë asgjë. Ai ka nënshkruar shumë marrëveshje, duke përfshirë tre që kur u bëra President në vitin 2021. Njëra kishte të bënte me targat në komunitetet serbe në veri. Një për njohjen e letërnjoftimeve kosovare në pikat kufitare me Serbinë dhe një për një marrëveshje energjetike. Vuçiq nuk ka zbatuar asnjë nga këto marrëveshje. Gjithmonë duhet të negociosh dy herë me Serbinë: së pari duhet t’i bindësh të nënshkruajnë, dhe më pas duhet të zbatosh atë që kanë nënshkruar. Kjo e fundit është më e vështirë se e para. Por përkundrazi. Shumë pak presion po i bëhet Vuçiqit”, ka thënë Osmani ndër të tjera.
