Presidentja e Kosovës, Vjosa Osmani, ka njoftuar se të enjten, në kuadër të Forumit Ekonomik Botëror në Davos, është takuar me Presidentin e Singaporit, Tharman Shanmugaratnam.
Ajo bëri të ditur se në këtë takim u diskutua për marrëdhëniet ndërshtetërore, mundësitë për intensifikimin e bashkëpunimit ekonomik, si dhe koordinimin në arenën ndërkombëtare.
Sipas Osmanit, një nga temat kryesore të bisedës ishte liberalizimi i vizave, ku ajo propozoi që pas heqjes së vizave për qytetarët e Kosovës me pasaporta diplomatike dhe zyrtare, hapi i radhës të jetë liberalizimi i plotë i vizave për të gjithë qytetarët e Kosovës.
“Pas liberalizimit të vizave për qytetarët tanë me pasaporta diplomatike dhe zyrtare, propozova që hapi i radhës të jetë liberalizimi i plotë i vizave për të gjithë qytetarët tanë, një hap që do të forconte edhe më tej bashkëpunimin mes dy shteteve dhe do të afronte më shumë popujt tanë”, ka shkruar Osmani në Facebook.
Po ashtu, gjatë takimit u diskutua edhe për organizimin e një forumi të përbashkët ekonomik, si dhe për hapjen e kapitujve të rinj të bashkëpunimit ndërmjet Kosovës dhe Singaporit në fusha të ndryshme me interes të dyanshëm./teve1.info/
