Osmani pasi falënderoi gjeneralmajorin Correl për gjithë angazhimin e tij ndërmjet FSK-së dhe Gardës Kombëtare të lowa-s, e dekoroi atë me Medaljen Presedenciale Ushtarake.
“Pasi që ka falënderuar gjeneralmajorin Correl për gjithë angazhimin e tij në fushën e bashkëpunimit bilateral ndërmjet FSK-së dhe Gardës Kombëtare të Iowa-s, si dhe kontributin në fushën e mbrojtjes së Republikës së Kosovës dhe qytetarëve të saj, Presidentja Osmani e ka dekoruar me Medaljen Presidenciale Ushtarake”, thuhet në njoftimin e Zyrës së Presidentes.
Po ashtu, në njoftim thuhet se Osmani ka theksuar se Programi i Bashkëpunimit në fushën e Sigurisë i Departamentit të ShBA-ve, është thelbësor për marrëdhëniet strategjike me Shtetet e Bashkuara të Amerikës.
“Në këtë kontekst, ajo ka çmuar angazhimin e deritashëm të gjeneralmajorit Correl, duke shfaqur shpresën se marrëdhëniet në fushën e sigurisë ndërmjet të dy shteteve vetëm sa do të thellohen në të ardhmen”, thuhet tutje në njoftim.
Presidentja Osmani nuk la pa falënderuar shtetin e lowa-s për qindra burra dhe gra të Gardës Kombëtare me uniformë, e që të cilët kanë shërbyer në Kosovë gjatë viteve në kuadër të KFOR-it.
Ndërkaq gjeneralmajori Correl tha se ndihet i nderuar me dekoratën e Presidentes Osmani, e cila sipas tij do të shërbejë si një kujtim i çmuar i partneritetit me ushtrinë dhe shtetin e Kosovës. Gjeneralmajor Correl ka potencuar se do të vazhdojë ta mbështesë Kosovën në çfarëdo kapaciteti që do të jetë i angazhuar./teve1.info/.
