Të enjten, e para e shtetit, Vjosa Osmani tha se si presidente nuk po trajtohet barabartë nga organet e drejtësisë.
Ajo tha se këto institucione nuk kanë marrë asnjë masë ndaj kërcënimeve ndaj saj.
“Deri sot, përkundër dhjetëra kërcënimeve me jetë, për vrasje me plumb në ballë, për ngrehje zhag e dëbim nga Kosova e për dhunim të fëmijëve të mi është hera e vetme në historinë e institucioneve të Kosovës që drejtësia nuk ka marrë asnjë masë, zero”, tha presidentja.
Se a është intervistuar e para e shtetit dhe pyetjet e tjera, nuk dhanë detaje nga Prokuroria Speciale e Kosovës.
Por në komunikatën e fundit, thanë se kanë marrë veprimet e nevojshme hetimore.
“Prokuroria Speciale e Republikës së Kosovës me të pranuar informacionin nga Policia e Kosovës, ka ndërmarrë të gjitha veprimet e nevojshme hetimore lidhur me rastin konkret. Prokurori i rastit, tashmë ka takuar dhe autorizuar Njësinë nga Krimet e Rënda dhe Krimet Kibernetike për të mbledhur prova dhe është në koordinim të plotë me hetuesit policorë, në identifikimin e të dyshuarve dhe sigurimin e provave për ndriçimin e dhe zbardhjen e plotë të këtij rasti penal. Në këtë fazë, nuk mund të ndajmë më shumë informacione lidhur me zhvillimin e procedurave hetimore”, thuhet nga Prokuroria Speciale.
Burime brenda Prokurorisë Speciale kanë thënë se rasti është duke u trajtuar.
Për profesorin Avdi Smajljaj, institucionet e drejtësisë nuk duhet të injorojnë institucionin më të lartë të shtetit.
Smajljaj foli edhe deklaratat e Osmanit për sigurinë e vajzave të saj.
Ai tha se në rast të kësaj frike, e para e shtetit mund të jep dorëheqje por nuk beson që e bën.
Të enjten, e para e shtetit mbajti një deklarim para gazetarëve ku foli për shkollimin e vajzave të saj dhe rastet e saj të kërcënimit. Gjithashtu ajo i sulmoi edhe gazetarët duke i quajtur “Radojciqa”.
