Ministri i Jashtëm i Maqedonisë së Veriut, Bujar Osmani thotë se ka shumë arsye për të qenë optimist se propozimi evropian do të nënshkruhet nga Kosova dhe Serbia.
Në një lidhje direkte në Edicionin special në Tëvë 1, ai potencoi se Maqedonia e Veriut e mbështet dialogun Kosovë – Serbi, me një marrëveshje e cila e ka në qendër njohjen reciproke.
“Pozicioni zyrtar i Maqedonisë së Veriut është se ne e mbështesim dialogun Kosovë – Serbi për një marrëveshje gjithëpërfshirëse që ka në qendër njohjen e ndërsjellë ndërmjet dyja shteteve. A do arrihet ajo në faza apo në një paketë është çështje e dialogut. Ajo çfarë mund të them është se status quo nuk është e favorshme as për Kosovën as për rajonin”, deklaroi ai, përcjell teve1.info
Osmani shpreson se raportet do të normalizohen pas sipas tij, do jetë një momentum i ri për qytetarët e Kosovës, Serbisë, e rajonit.
Kryeministri i Kosovës, Albin Kurti po qëndron në Ohër ku fillimisht ka mbajtur takim me shefin e diplomacisë së BE-së, Josep Borrell e pastaj do ketë takim trepalësh edhe me presidentin serb, Aleksandar Vuçiq.
Në këtë takim pritet të nënshkruhet propozimi i BE-së për normalizimin e raporteve mes Kosovës dhe Serbisë. /Teve1.info/
