Presidentja e Kosovës, Vjosa Osmani, në një intervistë për Bloomberg, ka folur për situatën politike në vend dhe pritshmëritë e saj lidhur me zgjedhjet e parakohshme të 28 dhjetorit, duke theksuar se procesi aktual është dëshmi e funksionimit të demokracisë në përputhje me Kushtetutën.
Sipas Osmanit, pamundësia për të formuar një koalicion qeverisës e bën të domosdoshme kthimin në zgjedhje, ashtu siç e parashikon rendi kushtetues i vendit.
“Ajo që ka ndodhur gjatë muajve të fundit është, në fakt, demokracia duke luajtur rolin e saj. Sipas Kushtetutës sonë, nëse nuk formohet një koalicion qeverisës, atëherë vendi duhet të shkojë përsëri në zgjedhje dhe kjo është pikërisht ajo që po ndodh tani”, ka deklaruar Osmani.
Presidentja ka vënë në dukje se, pavarësisht krizës politike, komunikimi ndërmjet udhëheqësve të partive po tregon shenja më konstruktive, me një gatishmëri më të madhe për bashkëpunim dhe pa vendosje të vijave të kuqe.
“Nga gjuha që përdorin udhëheqësit e partive politike, tashmë shoh një rol më konstruktiv nga secili prej tyre, pa linja të kuqe për të punuar së bashku. Kjo është një shenjë pozitive për periudhën pas zgjedhjeve”, është shprehur ajo.
Osmani ka shprehur gjithashtu optimizëm se pas zgjedhjeve do të pasojë një proces i shpejtë i konfirmimit të rezultateve dhe i formimit të institucioneve, duke u mbështetur në procedurat e sqaruara tashmë nga Gjykata Kushtetuese.
“Pasi të mbahen zgjedhjet, presim një proces të shpejtë të konfirmimit të rezultateve dhe formimin e parlamentit, tani me procedura që janë të qarta dhe të përcaktuara nga Gjykata Kushtetuese. Jam shumë optimiste se do të ketë një qeveri, por natyrisht kjo mbetet në dorën e partive politike”, ka theksuar presidentja.
Në fund, ajo ka nënvizuar rëndësinë e formimit të shpejtë të institucioneve për të mundësuar avancimin e projekteve strategjike të Kosovës me partnerët ndërkombëtarë.
“Ne kemi nevojë për institucione funksionale që të mund të ecim përpara edhe me projekte të mëdha me Bashkimin Evropian dhe Shtetet e Bashkuara të Amerikës”, ka përfunduar Osmani.
