Presidentja e Kosovës, Vjosa Osmani ka deklaruar se moskonstituimi i Kuvendit të Kosovës e rrezikon funksionimin kushtetues të institucioneve.
Osmani ka paralajmëruar se takimi i së enjtes me liderët e partive është vetëm fillimi i një serie takimesh dhe diskutimesh lidhur me këtë çështje.
Ajo ka shtuar se nuk dëshiron të paragjykoj për rezultatet e këtij takimi por ka uruar që secili nga liderët do të angazhohet duke vënë si parësor interesin e Kosovës.
“Unë i falenderoj liderët e partive që i janë përgjigjur pozitivisht. Ky është vetëm fillimi i një serie takimesh ne do të vazhdojmë varësisht se si shkojnë diskutimet nesër, qoftë në atë format, qoftë në formate të ngjashme, qoftë në takime një nga një me liderët e partive. Si institucion i Presidencës jemi në zbatim të detyrave kushtetuese sepse siç e dini neni 84 përcakton që presidentja e vendit ka për detyrë të garantojë funksionimin kushtetues të institucioneve. Moskonstituimi i Kuvendit të Kosovës e rrezikon pikërisht funksionimin kushtetues të institucioneve që është edhe arsyeja pse i kam ftuar liderët që të diskutojmë rrugën përpara. Nuk do të doja të paragjykoja tani për rezultatet por shpresoj që secili do të angazhohet duke vënë si parësor interesin e vendit dhe kur ndodhë kjo rezultatet gjithmonë janë pozitive”, ka thënë Osmani gjatë konferencës për media, pas takimit me presidentin e Këshillit Evropian, Antonio Costa.
Më tej, Osmani ka thënë se Kosova ka nevojë sa më parë për Kuvend pasi sipas saj ka shumë marrëveshje ndërkombëtare, ligje dhe dokumente të cilat nëse nuk ratifikohen e miratohen së shpejti pëson Kosova dhe qytetarët e saj.
“Kosova ka nevojë sa më parë për Kuvend nëse jo për asgjë tjetër ka nevojë në mënyrë që të ketë vendim të Kuvendit sa i përket Planit Evropian të Rritjes, por ka edhe shumë marrëveshje ndërkombëtare, ligje dhe dokumente të tjera të cilat në qoftë se nuk ratifikohen e miratohen së shpejti pëson Kosova, pësojnë qytetarët tanë dhe shpresoj që të gjithë liderët e partive politike këtë ta vendosin si prioritet gjatë diskutimeve nesër të cilat tani siç e thashë nuk mund të paragjykoj sesi do të rezultojnë në fund”, është shprehur ajo./teve1.info/
