Presidentja e Kosovës, Vjosa Osmani të mërkurën në konferencën e përbashkët që pati me homologen e saj zvicerane, Karin Keller-Sutter ka folur edhe rreth ngërçit politik të krijuar në Kosovë për shkak të moszgjedhjes së kryetarit të ri të Kuvendit.
Osmani duke iu përgjigjur pyetjeve të gazetarëve ka thënë se edhe pse gjendja aktuale nuk është jashtë normës evropiane, si presidente është e shqetësuar për këto vonesa pasi sipas saj barrën e tyre e paguajnë qytetarët e Kosovës.
Ajo ka shtuar se me moskonsituimin e Kuvendit nuk arrihet një Kuvend funksional në të cilin mund të ratifikohen marrëveshjet ndërkombëtare, por edhe krijohen dëme të shumta.
“Në Kosovë kemi pasur zgjedhje të lira e demokratike në shkurt të këtij viti dhe pas një periudhe janë certifikuar rezultatet zgjedhore. Më 15 prill është mbajtur seanca e parë e parlamentit, ku kanë filluar edhe përpjekjet e para për krijimin apo konstituimin e Kuvendit dhe krijimin e Qeverisë. Tani ka kaluar më shumë se një muaj nga përpjekjet e para në këtë drejtim dhe fatkeqësisht ende nuk ka sukses. Mirëpo, edhe nëse e krahasojmë me shumë vende të ndryshme në Evropë, ka raste kur përpjekjet për krijimin e një koalicioni qeverisës zgjasin me muaj të tërë, pra nuk është jashtë normës evropiane. Kjo nuk do të thotë megjithatë qe ne nuk shqetësohemi për këto vonesa. Si presidente jam e shqetësuar për këto vonesa, sepse barrën e këtyre vonesave e paguajnë qytetarët e Kosovës. Me moskonsituimin e Kuvendit ne nuk arrijmë ta kemi një Kuvend funksional, ku mund të ratifikohen marrëveshjet ndërkombëtare dhe ka edhe dëme të shumta të cilat ne i mbajmë si barrë, si qytetarë të Kosovës për shkak të mungesës së Kuvendit të Republikës së Kosovës”, ka deklaruar Osmani.
Megjithatë, ajo është shprehur e bindur se partitë politike shumë shpejt do të arrijnë një marrëveshje për ta tejkaluar situatën e tanishme.
“Unë jam besimplotë që partitë politike të përfaqësuara në Kuvend, shumë shpejt do të arrijnë një marrëveshje për ta kaluar këtë situatë të tanishme, sepse sa herë e vendosin vendin si parësor, interesat e shtetit para gjithçka tjetër, gjithmonë zgjidhja politike është afër”, ka shtuar ajo.
Të mërkurën ka dështuar edhe tentativa e 19-të për konstituimin e Kuvendit të Kosovës, pasi as në këtë seancë nuk u arrit të votohej komisioni për votim të fshehtë, i domosdoshëm për zgjedhjen e kryeparlamentarit.
