Presidentja e Republikës së Kosovës, Vjosa Osmani në Samitin e Kopenhagës për Demokraci, ka deklaruar se Serbia është dëshmuar të jetë dorë e zgjatur shumë lojale e Rusisë, që përpiqet të luaj me ato lojërat e Putinit në Ballkan Perëndimor.
Osmani ka thënë se Kosova ka rritur bashkëpunimin me aleatët për tu siguruar që çdo qëllim destabilizues në kufirin verior të Kosovës të kthehet mbrapshtë.
“Siç e dini Kosova kufizohet me Serbinë vend që është dëshmuar të jetë dorë e zgjatur shumë lojale e Rusisë që përpiqet të luaj me ato lojërat e Putinit në Ballkan Perëndimor duke hapur një front të ri ndaj perëndimit sepse ky efekti shpërndarës me të cilin Rusia do të arrinte shpërqendrimin e vëmendjes nga Ukraina, kjo do të ishte shumë e nevojshme për ta. Puna që mbajmë bashkë me aleatët tanë, NATO-n, për të siguruar që Kosova të mbetet e sigurt e stabile, është një gjë që bëjmë çdo dite çdo orë. Vitin e kaluar patëm një sulm paramilitar që shkoi deri në akt të agresionit nga Serbia, por që arritëm ta kthenim mbrapshtë përkundër madhësisë së sulmit, sepse bashkëpunuam me aleatët tanë. Kjo nuk do të thotë që nuk do të përpiqen prapë në të ardhmen, ajo që nënkuptohet këtu është që ne do të jemi të suksesshëm për t’i ndalur që në orët e para”, u shpreh ajo.
Po ashtu e para e vendit, u shpreh krenare që Kosova është tregim i i demokracisë që jep rezultat.
“Jemi dëshmitar të një sulmi të pandalshëm ndaj vlerave demokratike nga autokratët që e shohin demokracinë si kërcënim të drejtpërdrejtë ndaj ambicieve të tyre. Sa më e madhe të jetë dëshira e tyre për ta minuar demokracinë aq më e fortë duhet të jetë vendosmëria jonë për ta luftuar. Jam krenare që qëndroj në këtë podium të sotëm për të ndarë me juve një këndvështrim në historinë e Kosovës si tregim i shpresës si tregim i demokracisë që jep rezultat”, shtoi ajo.
