Një fëmijë është aksidentuar nga një automjet në Mitrovicë dhe ka përfunduar në Shërbimin Emergjent të Spitalit të Përgjithshëm për trajtim mjekësor.
Sipas njoftimit zyrtar të spitalit, bëhet fjalë për një djalë të lindur në vitin 2013, i cili rreth orës 19:55 është paraqitur për ndihmë mjekësore pas goditjes nga vetura. Menjëherë pas pranimit, ekipet mjekësore kanë kryer ekzaminimet emergjente dhe kanë ndërmarrë masat e nevojshme reanimatore.
Nga vlerësimet mjekësore, është bërë e ditur se fëmija ka pësuar lëndime në zonën e fytyrës dhe sinuseve, por gjendja e tij shëndetësore është stabile dhe jashtë rrezikut për jetë.
Për trajtim dhe vlerësim të mëtejshëm specialistik, fëmija është referuar në Qendrën Klinike Universitare të Kosovës (QKUK), ku do të konsultohet nga ekipet e Neurokirurgjisë dhe Kirurgjisë Maksilofaciale. /teve1.info/
