Presidentja e vendit, Vjosa Osmani është duke qëndruar në Kalabri të Italisë, me ftesë të komunitetit të arbëreshëve të këtij rajoni.
Me këtë rast, ajo ka publikuar një video nga pritja që i është bërë atje, përcjell teve1.info
“Mirë se ju gjeta, arbëreshë të dashur!”, ka shkruar ajo.
Në një ceremoni të veçantë, e cila do të organizohet në komunën e Frasnitës, Presidentes do t’i ndahet çmimi “Gjergj Kastrioti”.
Gjatë qëndrimit në Kalabri, Presidentja Osmani do të ketë takime të ndara me kryetarin e Rajonit të Kalabrisë, në Katanzaro, me kryetaren e Provincës së Kozencës, si dhe me kryetarët e komunave arbëreshë të këtij rajoni, me të cilët do të diskutojë mbi mundësitë e thellimit të mëtejmë të bashkëpunimit të Kosovës me komunat arbëreshe të këtij rajonit, thuhet në njoftimin e Presidencës.
Osmani do ta ketë edhe një bashkëbisedim me studentët dhe mësimdhënësit e Universitetit të Kalabrisë.
Presidentja do të marrë pjesë në aktivitete të shumta të cilat e kanë në fokus traditën, ritet e kulturën arbëreshe. /Teve1.info/
